सांगोल्यात बेकायदेशीर कोचिंग क्लासेसचे जाळे? पालकांमध्ये संताप; प्रशासनाच्या कारवाईची जोरदार मागणी
सांगोल्यात बेकायदेशीर कोचिंग क्लासेसचे जाळे?
पालकांमध्ये संताप; प्रशासनाच्या कारवाईची जोरदार मागणी
सांगोला | प्रतिनिधी
सांगोला शहरात दिवसेंदिवस वाढत असलेल्या खाजगी कोचिंग क्लासेसच्या अनियमित कारभाराबाबत पालक, सामाजिक कार्यकर्ते आणि नागरिकांमध्ये तीव्र नाराजी व्यक्त होत आहे. अनेक कोचिंग क्लासेस आवश्यक परवानग्या, सुरक्षा उपाययोजना आणि शासकीय नियमांचे पालन न करता सुरू असल्याचा आरोप होत असून, विद्यार्थ्यांच्या सुरक्षिततेचा प्रश्न ऐरणीवर आला आहे.
मिळालेल्या माहितीनुसार, काही क्लासेसमध्ये क्षमतेपेक्षा जास्त विद्यार्थ्यांना बसवले जात असून अग्निसुरक्षा यंत्रणा, आपत्कालीन बाहेर पडण्याचे मार्ग तसेच मूलभूत सुविधा अपुऱ्या असल्याचे सांगितले जात आहे. यामुळे कोणतीही दुर्घटना घडल्यास विद्यार्थ्यांच्या जीवितास गंभीर धोका निर्माण होऊ शकतो.
याशिवाय, काही संस्थांकडून पालकांकडून अवाजवी शुल्क आकारले जात असल्याच्या तक्रारीही पुढे येत आहेत. प्रवेशावेळी मोठमोठी आश्वासने दिली जात असली तरी प्रत्यक्षात अपेक्षित सुविधा मिळत नसल्याची भावना पालकांनी व्यक्त केली आहे.
शहरात शिक्षणाच्या नावाखाली सुरू असलेल्या या व्यवसायावर नियंत्रण ठेवण्यासाठी शिक्षण विभाग, नगर परिषद, अग्निशमन विभाग आणि जिल्हा प्रशासनाने संयुक्त विशेष तपासणी मोहीम राबवावी, अशी मागणी जोर धरत आहे. नियमांचे उल्लंघन करणाऱ्या संस्थांवर दंडात्मक कारवाई करून विद्यार्थ्यांच्या हिताचे संरक्षण करावे, अशी अपेक्षा नागरिकांकडून व्यक्त केली जात आहे.
मुलींच्या सुरक्षिततेचा प्रश्नही ऐरणीवर
सांगोला शहरातील काही खाजगी कोचिंग क्लासेसमध्ये मोठ्या संख्येने मुली - विद्यार्थिनी शिक्षण घेत आहेत. मात्र अनेक ठिकाणी स्वतंत्र स्वच्छतागृहे, सीसीटीव्ही यंत्रणा, महिला सुरक्षा उपाययोजना तसेच तक्रार निवारण यंत्रणा नसल्याची बाब समोर येत आहे. त्यामुळे पालकांमध्ये चिंतेचे वातावरण निर्माण झाले आहे.
विशेषतः सकाळी लवकर किंवा रात्री उशिरापर्यंत चालणाऱ्या वर्गांमुळे मुलींच्या सुरक्षित प्रवासाचाही प्रश्न निर्माण होत आहे. काही ठिकाणी गर्दी, अपुरी जागा आणि सुरक्षा व्यवस्थेचा अभाव यामुळे विद्यार्थिनींना अस्वस्थ वातावरणाला सामोरे जावे लागत असल्याची चर्चा पालकांमध्ये आहे.
महिला व बालसुरक्षा नियमांचे काटेकोर पालन, सीसीटीव्ही व्यवस्था, स्वतंत्र स्वच्छतागृहे, पुरेशी प्रकाश व्यवस्था आणि महिला विद्यार्थिनींसाठी सुरक्षित वातावरण उपलब्ध करून देणे प्रत्येक कोचिंग संस्थेची जबाबदारी असल्याचे पालकांचे मत आहे.
विद्यार्थ्यांचे शिक्षण जितके महत्त्वाचे आहे, तितकीच त्यांची सुरक्षितता महत्त्वाची आहे. विशेषतः मुली व महिला विद्यार्थिनींसाठी सुरक्षित आणि सन्मानजनक वातावरण उपलब्ध असणे ही काळाची गरज आहे," अशी भावना पालक व नागरिकांकडून व्यक्त होत आहे.
नागरिकांच्या प्रमुख मागण्या
1)सर्व कोचिंग क्लासेसची तातडीने तपासणी करावी.
२)वैध परवाने व नोंदणीची पडताळणी करावी.
३) अग्निसुरक्षा आणि इमारत सुरक्षा नियमांची अंमलबजावणी करावी.
४)अवाजवी शुल्क आकारणाऱ्या संस्थांवर कारवाई करावी.
५)विद्यार्थ्यांच्या सुरक्षिततेसाठी स्वतंत्र मार्गदर्शक तत्त्वे लागू करावीत
पालकांची अतिरिक्त मागणी
६) मुलींसाठी स्वतंत्र व स्वच्छ स्वच्छतागृहाची व्यवस्था.
७)सर्व क्लासेसमध्ये कार्यरत सीसीटीव्ही यंत्रणा.
८)महिला विद्यार्थिनींच्या सुरक्षिततेसाठी विशेष मार्गदर्शक तत्त्वे.
९) तक्रार निवारण समिती व हेल्पलाइनची व्यवस्था.
१०) रात्रीच्या वर्गांसाठी सुरक्षित परिसर व पुरेशी प्रकाश व्यवस्था.
"विद्यार्थ्यांचे भविष्य घडवणाऱ्या संस्था सुरक्षित, पारदर्शक आणि नियमबद्ध असणे ही काळाची गरज आहे. प्रशासनाने याकडे गांभीर्याने लक्ष देऊन योग्य ती कारवाई करावी," अशी भावना पालक वर्गातून व्यक्त होत आहे.
